काठमाडौं । ललित स्मृति यु–१८ युथ लिग फुटबल प्रतियोगिता अन्तर्गत अपराजित रहेको नेपाल पुलिस क्लबले आइतबार पहिलो हार बेहोरेको छ ।

सातदोबाटो स्थित एन्फा कम्प्लेक्समा भएको दशौं चरणको खेलतर्फ पुलिसले न्युरोडटिम (एनआरटी) सँग ४–२ को हार बेहोरेको हो ।

यो जितपछि १० खेलबाट १९ अंक जोडेको एनआरटी लिगतालिकाको दोस्रो स्थानमा उक्लिएको छ । पराजित पुलिस भने २३ अंकका साथ शिर्ष स्थान मै कायम छ ।

त्यस्तै आइतबार नै भएको दोस्रो खेलमा जावलाखेल युथ क्लबले सातदोबाटो युथ क्लबलाई ४–१ को अन्तरले हरायो । यो नतिजापछि १० खेलबाट जावलाखेलको खातामा १४ अंक भएको छ भने पराजित सातदोबाटो ४ अंकका साथ पुछारबाट दोस्रो स्थान मै रहेर संघर्षरत छ ।