हेटौंडामा सञ्चालन भैरहेको स्थानीय तह सहीद स्मृति गोल्डकप फुटबल प्रतियोगितामा विभागीय टोली सशस्त्र प्रहरीको एपीएफलाई स्तब्ध पार्दै सर्लाहीको बागमती यूथ क्लव क्वार्टरफाइनलमा प्रवेश गरेको छ ।
बागमतीले एपीएफलाई २–१ गोल अन्तरले हराएको हो । विक्रम धिमालले खेलको ३७ औं मिनेटमा हेडमार्फत गोल गर्दै बागमतीलाई अग्रता दिलाएका थिए । ७४ औं मिनेटमा एपीएफका विश्वास उदासले बागमतीका विदेशी खेलाडीलाई लडाएपछि प्राप्त फ्रिकिकलाई सदुपयोग गर्दै सागर शाहीले गरेको हेडर गोलमा परिणत भएको थियो । ८३ औं मिनेटमा बागमतीका खेलाडीले डीबक्स क्षेत्रमा ह्याण्ड गरेपछि पाएको पेनाल्टीलाई सदुपयोग गर्दै एपीएफका रबि थिङले गोल गरे ।
दोस्रो हाफको सुरुवातीमा एपीएफका प्रदीप लामाको प्रहारलाई बागमतीका गोलरक्षक अरुण लामाले मुस्किलले बचाएका थिए । बागमतीका स्टेफन समिरको प्रहार पोष्ट नजिकैबाट बाहिरिएको थियो । लगत्तै एपीएफको पाएको काउन्टर अट्याक प्रहार गोलमा परिणत हुन सकेन । बल नियन्त्रणमा एपीएफको पकड भएपनि गोल गर्न नसक्दा २–१ को हार व्यहोर्न बाध्य भएको छ ।
खेलमा बागमती यूथ क्लवका विक्रम धिमाल म्यान अफ द म्याच हुँदै नगद १० हजारसहित प्रमाणपत्र प्राप्त गरे ।
एपीएफका प्रशिक्षक सुदीप श्रेष्ठले खेल राम्रो हुँदाहुँदै पनि खेलाडीको ‘हाइट’ले साथ नदिँदा हार ब्यहोर्नुपरेको प्रतिक्रिया दिए । ‘हाम्रो रणनीति सफल भएन । मुख्य खेलाडीको रुपमा रहेका मिडफिल्डर नै घाइते भए’, उनले भने ।
यता बागमतीका प्रशिक्षक सुनिल श्रेष्ठले पाएको मौका सदुपयोग गर्न नसकेको प्रतिक्रिया दिए । ‘हाम्रो अझै टिम सेट हुन पाएन । आश गरेको खेलाडीबाट राम्रो प्रदर्शन हुन सकेन’, उनले भने, ‘अर्को खेलमा थप सुधारिएको खेल प्रदर्शन हुनेछ ।’
मकवानपुर जिल्ला फुटबल संघको आयोजनामा सञ्चालन भैरहेको प्रतियोगिताको विजेताले १० लाख र उपविजेताले ५ लाख रुपैयाँ प्राप्त गर्नेछ ।
