काठमाडौं । बुधबारदेखि पूनः सुचारु भएको ललित स्मृति यु–१८ युथ लिग फुटबल प्रतियोगिता अन्तर्गत जावलाखेल युथ क्लब र नेपाल पुलिस क्लबले महत्वपूर्ण जित हात पारेका छन् ।

सातदोबाटो स्थित एन्फा कम्प्लेक्समा भएको दिनको पहिलो खेलमा जावलाखेलले न्युरोडटिम (एनआरटी) माथि २–१ को रोमाञ्चक जित निकाल्दै आफ्नो खातामा महत्वपुर्ण तीन अंक जोड्यो ।

त्यस्तै बुधबार नै भएको दोस्रो खेलमा उत्कृष्ट लयमा रहेको विभागीय टोली नेपाल पुलिस क्लबले मनाङ मस्र्याङ्दी क्लबमाथि ७–० को एकतर्फी जित निकाल्दै महत्वपुर्ण तीन अंक जोड्न सफल भयो ।

अखिल नेपाल फुटबल संघ (एन्फा) को आयोजनामा जारी प्रतियोगितामा कुल १२ ए डिभिजन टोलीहरुले सहभागिता जनाएका छन् । प्रतियोगिताको समापन आगामी पुष १६ गतेका दिन हुनेछ ।