काठमाडौं । साफ यु–१५ महिला च्याम्पियनसिप फुटबल प्रतियोगिता यस वर्ष नेपाल मै हुने भएको छ । यो कुराको पुष्टी अखिल नेपाल फुटबल संघ (एन्फा) ले समेत गरेको छ ।

एन्फाले प्रतियोगिता आयोजनाका लागि आवश्यक तयारी स्वरुप शिलबन्दी बोलपत्रको सूचना प्रकाशित गरेको छ । सूचनामा जनाएअनुसार प्रतियोगिता आउँदो नोभेम्बर ७ देखि १७ तारीख (कार्तिक २१ देखि मंसिर १ गते) सम्म काठमाडौंमा हुनेछ ।

एन्फाले निकालेको सूचनामा यातायात, होटल, म्याच बल तथा सुरक्षा व्यवस्थापनबारे शिलबन्दी बोलपत्र आह्वान गरेको छ । प्रतियोगिताबारे एन्फाले विस्तृत रुपमा भने खुलाएको छैन । यद्यपि प्रतियोगितामा दक्षिण एसियाका सबै टोलीले सहभागिता जनाउने सम्भावना छ ।