मकवानपुरको मनहरी गाउँपालिका हाँडीखोलाको राप्ती रिभर युवा क्लव (आरआर वाइसी)ले सी डिभिजन लिग फुटबलको छनौट खेल्ने भएको छ ।

क्लवलाई व्यवसायिक बनाउँदै लिग फुटबलमा समेत पु¥याउन सी डिभिजन छनौट खेल्ने निर्णय गरेको हो । अखिल नेपाल फुटबल संघ (एन्फा)ले यही भदौ १ गतेबाट सी डिभिजन छनौट खेल सञ्चालन गर्दैछ । क्लवलाई ए डिभिजन लिगसम्म खेलाउने उद्देश्यले सी डिभिजन छनौटमा सहभागी हुन लागेको आरआर वाइसीका अध्यक्ष रेशम जम्कट्टेलले जानकारी दिए ।

सी डिभिजन छनौट खेलमा सहभागी हुन जान लागेको क्लवले खेलाडीलाई आवश्यक प्रशिक्षण गराइरहेको छ । क्लवलाई सी डिभिजन छनौट खेल्नको लागि ओरन्टो मल्टिट्रेड प्रा.लि कम्पनीका बोर्ड अफ डाइरेक्टर ईन्दिरा शाहले एकलाख ३५ हजार रुपैयाँ सहयोग गरेकी छिन् ।

छनौट खेलका लागि करिब ५ देखि ६ लाख रुपैयाँ खर्च हुने अनुमान गरिएको छ ।