काठमाडौं । भुटानमा जारी साफ यु–१७ च्याम्पियनसिपतर्फ गत संस्करणका दुई फाइनलिस्ट साविक विजेता भारत र उपविजेता बंगलादेश सेमिफाइनलमा प्रवेश गरेका छन् ।

मंगलबार समूह ए तर्फको अन्तिम खेलमा भारतले लगातार दोस्रो जित दर्ता गरेपछि सेमिफाइनल पुग्ने दुई टोलीको टुंगो लागेको हो । थिम्पु स्थित चाङलिमिथाङ स्टेडियममा भएको खेलमा भारतले माल्दिभ्सलाई ३–० ले हरायो ।

भारतले यसअघि बंगलादेशलाई १–० ले हराएको थियो । उता माल्दिभ्सले भने बंगलादेशसँग १–१ को बराबरी खेलेका थिए । २ खेलबाट ६ अंक जोडेको भारत समूह विजेताका रुपमा सेमिफाइनलमा प्रवेश गर्यो । त्यस्तै समान १–१ अंक भए तापनि गोलभिन्नताका आधारमा बंगलादेश दोस्रो स्थानमा रहेर समूह उपविजेताका रुपमा सेमिफाइनल प्रवेश गर्न सफल भयो । माल्दिभ्स भने पुछारमा रहँदै बाहिरिएको छ ।

Pic: SAFF