काठमाडौं । शहिद स्मारक सी डिभिजन लिगतर्फ आइतबार भएको पहिलो खेलमा झम्सीखेल युवा क्लबले महत्वपूर्ण जित हात पारेको छ । झम्सीखेलले रानीबन स्पोर्टस क्लबलाई २–१ ले हराउँदै महत्वपूर्ण तीन अंक जोडेको हो ।

एन्फा कम्प्लेक्समा भएको खेलमा झम्सीखेलका लागि आकाश राना र अस्मित थापाले गोल गरे । उता पराजित रानीबनका लागि श्याम ब्यादीले एक मात्र गोल फर्काएका थिए ।

यो जितपछि १० खेलबाट १६ अंक जोडेको झम्सीखेल लिगतालिकाको पाँचौं स्थानमा उक्लेको छ । पराजित रानीबन भने ७ अंकका साथ १२औं स्थानमा छ ।

आइतबार नै भएको अर्को खेलमा गोलबजार स्पोर्टस क्लब र पुल्चोक स्पोर्टस क्लबले १–१ गोलको बराबरी खेल्दै अंक बाँडे । गोलबजारका लागि ओमप्रकाश सिंहले गोल गरे भने पुल्चोकका लागि सागर थिङले गोल गरे ।

यो नतिजापछि १० खेलबाट २० अंक जोडेको पुल्चोक लिगतालिकाको दोस्रो स्थानमा उक्लेको छ । उता गोलबजार भने ६ अंकका साथ पुछार मै यथावत छ ।