काठमाडौंको बानेश्वर फुटबल टिम र पोखराको बगर भाई खलक हेटौंडामा जारी पाचौं हेटौंडा भेट्रान्स कप राष्ट्रिय एट ए साईड फुटबल प्रतियोगिताको फाइनल प्रवेश गरेको छ ।

शुक्रबारको पहिलो सेमिफाईनल खेलमा अमरसिंह कलबलाई १–०  गोल अन्तरले पराजित गर्दै बानेश्वर फुटबल टिमले उपाधी भिडन्त पक्का गरेको हो । खेलको १९ औ मिनेटमा बानेश्वर कलबका तर्फबाट राजु श्रेष्ठले गरेको गोल नै निर्णायक रह्यो । राजु नै खेलको म्यान अफ द म्याच घोषित भए ।

यस्तै शुक्रबार नै भएको दोश्रो सेमिफाईनल खेलबाट बौद्ध कलबलाई टाइब्रेकरमा २–० गोल अन्तरले पराजित गर्दै बगरभाईखलक पोखरा फाईनलमा प्रवेश गरेको छ । खेलको निर्धारीत समयमा दुबै टिमबाट गोल हुन नसकेपछि खेल टाईब्रेकरमा पुगेको थियो । टाईब्रेकरमा बगरभाईखलकले २ गोल गर्न सफल भएको थियो भने बौद्धले कुनै पनि गोल गरेन । खेलको म्यान अफ द म्याच बगर भाई खलकका गोल रक्षक लक्ष्मण गुरुगं घोषित भएका थिए ।

प्रतियोगिताको फाइनल खेल शनिबार हुँदैछ । प्रतियोगिताको विजेताले नगद १ लाख रुपैयाँ र उपविजेताले ५० हजार रुपैयाँ पुरस्कार पाउने आयोजक हेटौंडा भेट्रान्सले जनाएको छ ।