काठमाडौं । अष्ट्रेलियामा व्यवसाीक क्लब फुटबल खेल्ने क्रममा चोटिल बनेकी नेपालकी स्टार फरवार्ड साबित्रा भण्डारीले आफ्नो उपचारका लागि सहयोग गर्न अपिल गरेको २४ घण्टा नबित्दै उपचार खर्च जुटेको छ ।
साबित्राले सोमबार मात्रै आफ्नो आधिकारिक सामाजिक सञ्जालमार्फत आर्थिक सहयोग गर्न अपिल गरेकी थिईन् । उनको अपिलसँगै देशविदेशबाट उनलाई सहयोग गर्नेहरुको संख्या उर्लिएको थियो ।
यद्यपि मंगलबार साबित्राले अर्को स्टाटस लेख्दै आफ्नो उपचारमा लाग्ने आवश्यक खर्च जुटेको उनले जानकारी गराएकी छिन् । साबित्राका अनुसार उनको नेपाली खातामा एक करोड बडी र विदेशी खातामा ४५ लाख रुपैयाँ संकलन भएको जानकारी गराएकी छिन् ।
उनको खातामा संकलन भएको रकमले उपचार खर्चसँगै कतारमा लाग्ने आवश्यक आवास र यातायात लगायतका अन्य खर्चका लागि पनि पुग्ने उनले बताएकी छिन् । साथै उनले आफूलाई साथ, सहयोग गर्ने सबैलाई धन्यवाद समेत दिएकी छिन् ।
स्मरण रहोस, न्युजिल्याण्डको वेलिङटन फिनिक्स फुटबल क्लबबाट अष्ट्रेलियाको शिर्ष महिला लिग खेल्ने क्रममा साबित्रा गत पुषमा घाइते बनेकी थिईन् । ब्रिसबेन रोअर विरुद्ध खेल्ने क्रममा साबित्राको एसिएल च्यातिएको थियो । उनलाई उपचारपछि मैदान फर्किन एक वर्षसम्म लाग्ने बताइएको छ ।
साबित्राले खर्च उठेको जानकारी गराउन लेखेको उनको स्टाटस जस्ताको त्यस्तैः
आज 'धन्यवाद' शब्द निकै सानो लागेको छ । पछिल्लो २४ घण्टामा मेरो उपचारका लागि जुन साथ, विश्वास र माया मैले पाएको छु, त्यो शब्दले वर्णन गर्न सक्दिन । आर्थिक रुपमा त यहाँहरुले मेरो उपचारका लागि लाग्ने खर्च जुटाइदिनु भयो नै, मैले पाएको साथ र वाचाले मलाई अझ बलियो बनाएको छ । यहि उर्जाले म आफ्नो शल्यक्रिया र पुनर्स्थापनामा शत प्रतिशत मिहिनेत गर्नेछु ।
खेलाडीका रूपमा मैले आजसम्म कमाएको सबैभन्दा ठूलो सम्पत्ति पैसा र उपाधि होइन, यो माया, भरोसा र समर्थन भन्ने मैले फेरी एकपटक ह्रदयदेखि बुझेको छु । यही नै मेरो वास्तविक कमाइ हो ।
मेरो उपचारका लागि नेपाली बैंक खातामा एक करोड रुपैयाँभन्दा बढी र विदेशी प्लाटफर्ममा ४५ लाख नेपाली रुपैयाँ (५२ हजार न्युजिल्यान्ड डलर) जम्मा भएको छ । मलाई प्रायोजन गर्नुहुने संस्था र अन्य नेपालका धेरै संघ-संस्थाले पनि नगद र सुविधा सहयोगको वाचा गर्नुभएको छ । यसले मेरो उपचार खर्च मात्र नभएर, कतारमा उपचारका दौरान लाग्ने आवास र यातायात पनि पुग्ने देखिन्छ । कतारमा रहनुहुने विभिन्न व्यक्तित्व र संस्थाले पनि सहयोगको वाचा गर्नुभएको छ । त्यसैले म आजबाट नै दुवै अकाउन्टमा सहयोग रकम रोकिदिनु हुन अनुरोध गर्दछु ।
म आवद्ध क्लब वेलिंगटन फिनिक्सले पनि शल्यक्रिया र पुनर्स्थापनाका लागि विमा रकम निकासा गरी त्यसमा थप सहयोग गरेर उपचारमा सहजीकरण गरिरहेको छ । चाडैं नै शल्यक्रिया मिति पाएर प्रक्रिया अघि बढ्नेमा विश्वस्त छु ।
यो चोटले मलाई शारीरिक मात्र होइन, मानसिक रूपमा पनि थकाएको थियो। तर तपाईंहरूको साथले मलाई फेरि उठ्ने साहस दिएको छ। म एक्लो छैन भन्ने विश्वास दिएको छ ।
म दृढ संकल्पका साथ भन्छु, म फर्कनेछु । अझ मजबुत भएर फर्कनेछु । पुनः नेपालको जर्सी लगाएर मैदानमा उत्रिनेछु । देशको लागि, तपाईंहरूको लागि, र त्यो विश्वासको लागि जसले मलाई अघि बढाएको छ ।
मेरो तर्फबाट “धन्यवाद” मात्र पर्याप्त हुँदैन । तपाईंहरूको यो माया र समर्थनको साँचो धन्यवाद भनेको मेरो पुनरागमन हुनेछ । फेरि नेपालको जर्सी लगाएर देशको लागि जित्ने मेरो प्रतिवद्धता हुनेछ ।
