काठमाडौं । तेस्रो नेपाल सुपर लिगतर्फ शनिबार दुई खेलहरु सम्पन्न हुँदा एकमा निश्चित जितको नतिजा निस्किएको छ भने अर्को खेल बराबरीमा टुंगिएको छ ।

दिनको पहिलो खेलमा पोखरा थन्डर्सले काठमाडौं रेजर्सलाई २–० ले हरायो । यो जितसँगै ३ खेलबाट ३ अंक जोड्दै पोखरा चौथो स्थानमा उक्लिएको छ र प्ले अफ खेल्ने सम्भावनालाई कायम राखेको छ । पराजित काठमाडौं भने २ अंकका साथ छैठौं स्थानमा झरेको छ ।

शनिबार नै भएको अर्को खेलमा दुई दावेदार टोली धनगढी एफसी र ललितपुर सिटी एफसीले गोलरहित बराबरी खेल्दै अंक बाँडे । यो बराबरी नतिजाले धनगढी र ललितपुर दुवै टोलीले शिर्ष स्थानमा उक्लिने अवसर गुमाएका छन् ।

बराबरीपछि ३ खेलबाट ५ अंक जोडेको ललितपुर दोस्रो स्थानमा छ भने २ खेलबाट ४ अंक जोडेको धनगढी तेस्रो स्थानमा छ । शिर्ष स्थानमा भने २ खेलबाट ६ अंक जोडेको एफसी चितवन रहेको छ ।