बागधुरा । उत्कृष्ट जित निकाल्दै न्यु सृजना युवा क्लब, करौजिया जारी स्व. लाल बहादुर तथा डम्मरकुमारी छन्तेल स्मृति सातौं सञ्जिवनी कप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

सोमबार भएको दोस्रो क्वाटरफाइनलतर्फ न्यु सृजनाले उदय युवा क्लब, बर्दघाट, नवलपरासीलाई शून्यका विरुद्ध ५ गोलको अन्तरले हराउँदै अन्तिम चारमा स्थान बनाएको हो ।

न्यु सृजनाको जितमा हिमाल थापा मगरले ह्याट्रिक गरे भने थप दुई गोल समिर नेपालीले गरे । खेलमा न्यु सृजना कै समिर नेपाली म्यान अफ दि म्याच समेत घोषित भए ।

प्रतियोगिता अन्तर्गत माघ २२ गते मंगलबारको तेस्रो क्वाटरफाइनल खेल अमुवा युवा क्लब, अमुवा र झरना स्पोर्टस क्लब, कुञ्जलापुरबीच हुने खेल संयोजक खिम थापाले जानकारी दिए ।

सञ्जिवनी युवा क्लब, तिलोत्तमा–१४, बागधुरा, देवीनगरको आयोजनामा जारी प्रतियोगिताको विजेताले उपाधिसहित नगद १,२२,२२२ रुपैयाँ हात पार्नेछ भने उपविजेताले ६१,१११ रुपैयाँ सहित ट्रफी, मेडल र प्रमाणपत्र प्राप्त गर्नेछ । फाइनल खेल माघ २७ गतेका दिन हुनेछ ।