मरिण । सोमबारदेखि शुरु भएको मरिण गाउँपालिका अध्यक्ष कप नकआउट फुटबल प्रतियोगितामा साविक विजेता वार्ड नम्बर ३ ले उत्कृष्ट शुरुवात गरेको छ ।

उद्घाटन खेलमा वार्ड नम्बर ३ ले वार्ड नम्बर २ लाई शून्यका विरुद्ध ४ गोलको अन्तरले हराउँदै उत्कृष्ट शुरुवात गरेको हो । खेलमा वार्ड नम्बर ३ का लागि सुन्दर भोम्जन र मिथुन थिङ्गले समान दुई–दुई गोल गरे ।

प्रतियोगिता अन्तर्गत माघ ८ गते मंगलबार चार खेलहरु हुने आयोजकले जानकारी दियो । त्यसअघि प्रतियोगिताको उद्घाटन मरिण गाउँपालिकाका अध्यक्ष बिमर्स मोक्तानले गरेका थिए ।

मरिण गाउँपालिका खेलकुद विकास समिति, सिन्धुलीको आयोजनामा शुरु भएको प्रतियोगिताको आधिकारिक मिडिया पार्टनरमा गोलनेपाल डटकम रहेको छ ।