गाईघाट । यहाँ सम्पन्न दोस्रो उपमयर महिला गोल्डकप राष्ट्रिय फुटबल प्रतियोगिताको उपाधि बागमती युवा क्लब, सर्लाहीले जितेको छ । फाइनलमा धरान महिला फुटबल क्लबलाई शून्यका विरुद्ध १ गोलले हराउँदै बागमती च्याम्पियन बनेको हो ।

थरुहट रंगशालामा भएको प्रतिस्पर्धात्मक फाइनल भिडन्तमा बागमतीका लागि खेलको १८औं मिनटमा बिष्णु बलले गरेको एक मात्र गोल टोलीलाई उपाधि जिताउन एक मात्र निर्णायक गोल बन्यो ।

विजेता बनेको बागमतीले उपाधिसहित नगद १ लाख १० हजार हात पार्यो भने उपविजेता धरानले ५५ हजारसहित ट्रफी, मेडल र प्रमाणपत्रमा चित्त बुझाउन बाध्य बन्यो ।

उदयपुर जिल्ला फुटबल संघ, उदयपुरको आयोजना तथा त्रियुगा नगरपालिका, गाईघाट, उदयपुरको मुख्य प्रायोजनमा असार ११ गतेदेखि शुरु भएको प्रतियोगितामा कुल ८ टोलीहरुले सहभागिता जनाएका थिए ।