काठमाडौ । मंगलबार राती फिफा विश्वकप छनौटतर्फ नेपालले यमनसँग खेल्दा नेपाली टोलीका कप्तान तथा गोलरक्षक किरन चेम्जोङका लागि ऎतिहासिक र अविष्मरणीय बन्यो ।

त्यो खेल अन्तर्राष्ट्रिय फुटबलमा किरनको १००औं खेल थियो । नेपालका लागि १०० अन्तर्राष्ट्रिय खेल खेल्ने किरन पहिलो र एक्ला खेलाडी पनि बने ।

भलै मंगलबारको खेलमा नेपाल र यमनको नतिजा २-२ को बराबरीमा टुंगिए तापनि किरनका लागि भने त्यो विशेष उपलब्धिका रुपमा पनि रहयो ।

सोही अवसरमा किरन सम्मानित पनि भए । नेपाली टोलीसँगै साउदी अरेबिया पुगेका अखिल नेपाल फुटबल संघ (एन्फा) का महासचिव किरन राईले चेम्जोङलाई सम्मान गरे । सो अवसरमा एन्फाका केन्द्रिय सदस्य विकाश नारायण श्रेष्ठको पनि उपस्थिति रहेको थियो ।