पोखरा । ‘स्वास्थ्यको लागि एक घण्टा व्यायाम, नागरिकहरुका लागि नौलो आयाम’ भन्ने नारासहित पोखराको टुंडिखेलमा जारी १४औं बगर भाईखलक भेट्रान्स फुटबल प्रतियोगितामा ४० वर्ष उमेर समूहतर्फ गार्डेन एफसी र झम्सीखेल सेमिफाइनलमा प्रवेश गरेका छन् ।

प्रतियोगिताको पहिलो क्वाटरफाइनल खेलमा फ्रिडम फाइटर काठमाडौंलाई पेनाल्टी सुटआउटमा ७–६ गोल अन्तरले पराजित गर्दै गार्डेन सेमिफाइनलमा प्रवेश गरेको हो । खेलमा गार्डेनका सन्तोष कार्की म्यान अफ द म्याच घोषित भए ।

यस्तै दोस्रो क्वाटरफाइनल खेलमा आयोजक बगर भाइखलकलाई १–० गोल अन्तरले हराउँदै झम्सीखेल भेट्रान्स अन्तिम चारमा प्रवेश गर्न सफल भयो । खेलमा झम्सीखेलका लागि निर्णायक गोल गरेका विभोर गुरुङ म्यान अफ दि म्याच बने ।