काठमाडौं । एन्फा महिला लिग राष्ट्रिय फुटबल प्रतियोगितातर्फ उपाधिको बलियो प्रत्याशी मध्ये एक त्रिभुवन आर्मी फुटबल क्लबले सोमबार उत्कृष्ट जित हात पारेको छ ।

एन्फा कम्प्लेक्समा सम्पन्न खेलमा आर्मीले बागमती युवा क्लब, सर्लाहीमाथि ३–० को जित निकाल्यो । आर्मीको जितमा सपना लामा, पुनम जर्घा मगर र चन्द्रा भण्डारीले गोल गरिन् ।

खेलमा आर्मीलाई थप गोल गर्ने अवसर पनि थियो । आर्मीले पाएको पेनाल्टीको अवसरलाई बिमला चौधरीले सदुपयोग गर्न सकिनन् । यो नतिजापछि ५ खेलबाट आर्मीको खातामा १० अंक भएको छ । उता पराजित बागमतीको खातामा भने समान खेलबाट तीन अंक मात्र छ ।