काठमाडौं । प्रवासी नेपालीहरुद्वारा स्थापित कलेक्सन फुटबल क्लब (सिएफसी), दोहार, कतारको आयोजनामा जारी तेस्रो सिएफसी कपको सेमिफाइनल समिकरण पूरा भएको छ ।

प्रतियोगिताको क्वाटरफाइनल खेलहरुमा आ–आफ्नो खेल जित्दै आयोजक सिएफसी (रातो), रस्लाफन एफसी, एबिएफसी र पेट्रो एफसी सेमिफाइनलमा स्थान सुरक्षित गर्न सफल भएका छन् ।

पहिलो क्वाटरफाइनल सिएफसी (रातो) ले एनआरएनए एफसीलाई सडन देथमा हराउँदै सेमिफाइनल प्रवेश गरेको हो । त्यस्तै रस्लाफन एफसीले आयोजक सिएफसी (निलो) को चुनौति समाप्त पार्दै अन्तिम चारमा प्रवेश गर्यो ।

तेस्रो क्वाटरफाइनलमा एबिएफसीले स्टार एफसीलाई हराउँदै सेमिफाइनल स्थान सुरक्षित गर्दा अन्तिम क्वाटरफाइनलमा पेट्रो एफसीले बरवा एफसीलाई हराएर अन्तिम चारको यात्रा तय गर्न सफल भयो ।

अब आउने जनवरी ३ तारीख शुक्रबारका दिन हुने दुई सेमिफाइनलतर्फ पहिलो सेमिफाइनलमा सिएफसी (रातो) ले एबिएफसीको सामना गर्नेछ भने दोस्रो सेमिफाइनलमा रस्लाफन एफसीले पेट्रो एफसीसँग प्रतिस्पर्धा गर्नेछ ।

प्रतियोगिताको विजेताले उपाधिसहित नगद ६,६६६ कतारी रियाल हात पार्नेछ भने उपविजेताले ४,४४४ कतारी रियालसहित ट्रफी, मेडल र प्रमाणपत्र प्राप्त गर्ने खेल संयोजक डेनियल लिम्बुले जानकारी दिए ।