काठमाडौं । एन्फा युथ लिग अन्तर्गत सातौं चरणको खेलमा मनाङ मस्र्याङ्दी क्लब र जावलाखेल युथ क्लबले आ–आफ्नो खेलमा जित निकाल्दै महत्वपूर्ण तीन–तीन अंक जोडेका छन् ।

एन्फा कम्प्लेक्समा भएको खेलमा मनाङले एनआरटीमाथि २–१ को जित निकाल्यो । मनाङका लागि दर्शन अधिकारी र सुजल डंगोलले गोल गरे । पराजित एनआरटीका लागि भने सन्तोष गोङ्बाले गोल फर्काएका थिए ।

यो जितपछि ८ खेलबाट १८ अंक जोडेको मनाङ लिगतालिकाको दोस्रो स्थानमा उक्लेको छ । पराजित एनआरटी भने १६ अंकका साथ तेस्रो स्थानमा झरेको छ ।

बुधबार नै भएको अर्को खेलमा जावलाखेलले खराब लयमा रहेको त्रिभुवन आर्मी फुटबल क्लबलाई ३–१ ले हरायो । जावलाखेलको जितमा विवश दर्लामीले दुई गोल गर्दा थप एक गोल आर्मीले आत्मघाती गोलका रुपमा खान पुगेको थियो । उता आर्मीका लागि भने रोहित श्रेष्ठले एक मात्र गोल फर्काए ।

यो नतिजापछि ८ खेलबाट ८ अंक जोडेको जावलाखेल लिगतालिकाको मध्यतिर उक्लिएको छ । पराजित आर्मी भने ४ अंकका साथ पुछार तिरै संघर्षरत छ ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।