काठमाडौं । भारतमा आयोजना हुने प्रतिष्ठित १३३औं डुरान्ड कप अन्तर्राष्ट्रिय आमन्त्रण फुटबल प्रतियोगिता खेल्न जाने त्रिभुवन आर्मी फुटबल क्लबलाई बिहीबार विदाई गरिएको छ ।

सेनाको मुख्यालयमा भएको विदाई कार्यक्रममा आर्मीका खेलाडी तथा अफिसियलहरुलाई सैनिक तालिम महानिर्देशक उपरथी सन्तोष कुमार ढकालले शुभकामनासहित टोलीलाई विदाई गरे ।

स्मरण रहोस, डुरान्ड कपतर्फ यसपटक समूह एफमा परेको आर्मीले आफ्नो पहिलो खेल अगस्त २ तारीखका दिन घरेलु टोली शिलोङ लाजोङसँग खेल्नेछ ।

दोस्रो खेल ८ अगस्तका दिन इण्डियन सुपर लिग क्लब एफसी गोवासँग खेल्नेछ भने समूह चरणको आफ्नो अन्तिम खेल १३ अगस्तका दिन अर्को इण्डियन सुपर लिग क्लब हैदराबाद सिटी एफसीसँग खेल्नेछ ।

समूह एफका सबै खेलहरु शिलोङ स्थित जवाहरलाल नेहरु नेशनल स्टेडियममा हुनेछन् ।