दक्षिण कोरियाको थेगु शहर निवासी कोरियन व्यवसायी दम्पतीले तुलसीपुरस्थित हिरा डाँगी फाउण्डेशनअन्तर्गत फूटबल प्रशिक्षण गरिरहेका बालबालिकालाई एक कार्यक्रम आयोजना गरी खेलकूद सामग्री हस्तान्तरण गरेका छन् ।

कार्यक्रममा बालबालिकालाई फूटबल प्रशिक्षणका लागि आवश्यक पर्ने सामग्रीहरु किटवाला जुत्ता, जर्सी, फूटबललगायतका करिब तीन लाख बराबरको सामग्री हस्तान्तरण गरिएको थियो ।

यी सामग्रीहरु व्यवसायी दम्पती श्रीमान् खाङयोङ ग्यो र श्रीमती किम युनाले हस्तान्तरण गर्नुभएको थियो । कार्यक्रममा बोल्दै दाता खाङयोङ ग्योले हाल हिरा डाँगी फाउण्डेशनका प्रशिक्षक प्रेस गिरी कोरिया बस्दा आफ्नो चिनजान भएका कारण नेपालमा सहयोग गर्ने मनसाय बनाएको बताउनुभयो ।

उहाँले भन्नुभयो– ‘नेपाल रोज्नुको कारण प्रेसजीसँगको चिनजानले हो । खासगरी मेरो छोरा पनि फूटबल खेल्ने भएकोले फूटबल प्रशिक्षार्थीहरुलाई सहयोग गर्ने हाम्रो निर्णय भएको हो । आगामी दिनमा पनि यसलाई निरन्तरता दिनेछौं ।’ हाल हिरा डाँगी फाउण्डेशनमार्फत ७० जना बालबालिकाले फूटबल प्रशिक्षण गरिरहेका छन् । तीमध्ये ३० जना बालबालिकालाई अहिले विभिन्न खेलकूलका सामग्री हस्तान्तरण गरिएको प्रशिक्षक गिरीले जानकारी दिनुभयो ।

उहाँले भन्नुभयो– ‘उत्कृष्ट प्रदर्शन गर्ने बालबालिकालाई यी सामग्री हस्तान्तरण गरेका छौं । यो दम्पतीले हाल आर्थिक अवस्था कमजोर भएका एकजना बालकलाई निःशुल्क अध्ययन गर्ने वातावरण पनि मिलाइदिएको छ र आगामी वर्ष अरु एकजनालाई निःशुल्क अध्ययन गर्नका लागि छनोट गर्ने भएको छ ।’