काठमाडौं । दोस्रो नेपाल सुपर लिग (एनएसएल) मा आज अपराजित रहेको पोखरा थन्डर्स र साविक विजेता काठमाडौं रेजर्स भिड्दै छन् । दशरथ रंगशालामा साँझ ५ बजेदेखि शुरु हुने आजको खेल हेभिवेट भिडन्तका रुपमा पनि हेरिएको छ ।

चार खेलबाट दुई जित र दुई बराबरी सहित ८ अंकका साथ लिगतालिकाको तेस्रो स्थानमा रहेको पोखराले आज आफु अनुकुल नतिजा निकाल्न सके लिगतालिकामा स्पष्ट अग्रता सहित शिर्ष स्थानमा उक्लिने छ ।

उता चार खेलमा १ जित, २ बराबरी र एक हारसहित ५ अंकका साथ पाँचौं स्थानमा रहेको काठमाडौंलाई फेरि शिर्षताको होडसँगै शिर्ष चारमा उक्लिने अवसर पनि छ । युवा, स्टार र केही अनुभवी खेलाडीहरुले भरिएका यी दुई टोली बीचको भिडन्त रोमाञ्चक नै हुने अनुमान गरिएको छ ।