भिलझिले । मुनल्याण्ड स्र्पोटिङ क्लब र बनडाँडा फुटबल क्लब यहाँ जारी प्रथम बोका जुनियर कप नकआउट फुटबल प्रतियोगिताको क्वाटरफाइनलमा प्रवेश गरेका छन् ।

शिवसताक्षी नगरपालिका–८, झिलझिले स्थित स्थानीय खेलमैदानमा भएको प्रिक्वाटरफाइनलतर्फ मुनल्याण्डले फाक्तेप एफसीलाई टाईब्रेकरमा २–० ले हरायो । त्यसअघि निर्धारित समयको खेल दुवै टोलीले १–१ गोलको बराबरी खेलेका थिए ।

त्यस्तै सोही दिन भएको अर्को प्रिक्वाटरफाइनलमा बनडाँडाले रियल स्टार एफसीलाई २–० ले हराउँदै क्वाटरफाइनलमा स्थान सुरक्षित गर्न सफल भयो ।

बोका जुनियर फुटबल क्लब, शिवसताक्षी नगरपालिका–८, झिलझिले, झापाको आयोजनामा जारी प्रतियोगिताको विजेताले उपाधिसहित नगद २५ हजार हात पार्नेछ भने उपविजेताले १५ हजार प्राप्त गर्नेछ । फाइनल खेल यही असोज २० गतेका दिन हुनेछ ।