हेटौडा । यही माघ २८ देखि फागुन ११ गतेस्म्म हुने स्थानीय तह शहिद स्मृति अन्तर्राष्ट्रिय मकवानपुर गोल्डकपको पाँचौं संस्करणको तयारी पूरा भएको आयोजक मकवानपुर जिल्ला फुटबल संघले जनाएको छ ।

हेटौडा–५ स्थित पिप्ले क्याम्पा रंगशालामा हुने प्रतियोगिताको खेलतालिका समेत आयोजकले सार्वजनिक गरेको छ । जसअन्तरगत माघ २८ गते हुने प्रतियोगिताको उद्घाटन खेलमा नव जनजागृति युवा क्लब, सिमरा, बारा र रिगल रिसोर्ट हेटौडा मकवानपुर–११ बीच हुनेछ ।

प्रतियोगिताको मैदान व्यवस्थापन लगायत आवश्यक भौतिक पूर्वाधारका कामहरु पनि सबै सम्पन्न भईसकेको मकवानपुर जिल्ला फुटबल संघका अध्यक्ष टिकाराम लामाले जानकारी दिए । ए डिभिजन क्लब, मोफसलका टोली र एक विदेशी गरी कुल १२ टोलीहरुको सहभागिता रहेको प्रतियोगिताको विजेताले उपाधिसहित नगद १५ लाख हात पार्नेछ भने उपविजेताले १० लाख प्राप्त गर्नेछ ।

प्रतियोगिताको सर्वोत्कृष्ट खेलाडीले ५० हजार तथा विधागततर्फ उत्कृष्ट हुने खेलाडीहरुले जनही २५–२५ हजारसहित ट्रफी हात पार्नेछ ।