काठमाडौं । नेपाली राष्ट्रिय पुरुष फुटबल टोलीको अन्तरिम मुख्य प्रशिक्षकमा राष्ट्रिय टोली कै पूर्व कप्तान तथा प्रशिक्षक हरि खड्का नियुक्त भएका छन् । खड्कालाई शुक्रबार एक कार्यक्रमका बीच एन्फा महासचिव किरन राईले नियुक्तीपत्र हस्तान्तरण गरे ।

नेपाली फुटबलमा परिचित हरि खड्काले यसअघि राष्ट्रिय महिला फुटबल टोलीको मुख्य प्रशिक्षकका रुपमा काम गरिसकेका छन् । पुरुष फुटबल टोलीको मुख्य प्रशिक्षकमा भने उनको यो पहिलो अवसर हो ।

त्यसो त खड्का हाल एन्फा कै प्राविधिक निर्देशकका रुपमा पनि कार्यरत छन् । खड्काले अन्तरिम मुख्य प्रशिक्षकको नियुक्तीसँगै केही दिन अघि मात्रै राजिनामा दिएका पूर्व प्रशिक्षक म्याट रसको स्थान लिने छन् ।

उता एन्फाले खड्कालाई आगामी एएफसी एसियन कप छनौटसम्मका लागि नियुक्त गरिएको बताएको छ । एसियन कप छनौटतर्फ नेपालले आउँदो नोभेम्बर १८ तारीखका दिन मलेसियासँग खेल्ने कार्यक्रम छ । त्यस्तै अर्को बर्षको ३१ मार्चमा लाओससँग अन्तिम खेल खेल्ने कार्यक्रम छ ।

एसियन कप छनौटतर्फ समूह एफमा रहेको नेपाल अंकविहीन रुपमा समूहको पुछारमा रहेर प्रतियोगिताबाट बाहिरिसकेको छ । समूह एफबाट नेपालसँगै लाओस पनि बाहिरिसकेको छ । अर्का दुई टोलीहरु मलेसिया र भियतनामको सम्भावना भने कायम छ ।