केराबारी । केराबारी फुटबल क्लब र युनाइटेड आहाले युथ क्लब (बी) जारी प्रथम आहाले कप नकआउट फुटबल प्रतियोगिताको क्वाटरफाइनलमा प्रवेश गरेका छन् ।

मंगलबार भएको प्रिक्वाटरफाइनलतर्फको पहिलो खेलमा केराबारीले सुकेचौरी फुटबल क्लबलाई ३–० ले हराउँदै अन्तिम आठमा स्थान बनायो । केराबारीको जितमा मिलन लिम्बुले दुई गोल गर्दा थप एक गोल प्रवेश बस्नेतले गरे । खेलमा दुई गोलकर्ता केराबारीका मिलन लिम्बु म्यान अफ दि म्याच बने ।

दोस्रो खेलमा युनाइटेड आहालेले गुवाबारी फुटबल क्लबलाई १–० को साँघुरो अन्तरले हराउँदै क्वाटरफाइनल स्थान सुरक्षित गर्यो । युनाइटेड आहालेका लागि भुवन बस्नेतले एक मात्र निर्णायक गोल गरे । खेलमा युनाइटेड आहालेका योगेन्द्र कार्की म्यान अफ दि म्याच घोषित भए ।

युनाइटेड आहाले युथ क्लब र आहाले सामुदायिक वन, केराबारी–६, मोरङको आयोजनामा जारी प्रतियोगिताको बिजेताले ६५५५५ र उपबिजेताले ३५५५५ प्राप्त गर्नेछ । प्रतियोगितामा १६ टोलिको सहभागिता रहेको छ ।