काठमाडौं । साफ महिला च्याम्पियनसिपको फाइनलतर्फ यस वर्ष पनि लगातार गत संस्करणका दुई फाइनलिस्ट साविक विजेता बंगलादेश र आयोजक नेपाल भिड्ने पक्का भएको छ ।

आइतबार दशरथ रंगशालामा भएका दुई सेमिफाइनलतर्फ बंगलादेशले भुटानलाई र नेपालले भारतलाई हराएसँगै बंगलादेश र नेपालको फाइनल भिडन्त पक्का भएको हो ।

फाइनल खेल बुधबार हुँदैछ । यद्यपि फाइनल खेलका सबै टिकटहरु भने त्यसअघि ने बिक्री हुन सक्ने सम्भावना देखिएको छ । ऐतिहासिक फाइनल जित्ने र गत संस्करणको फाइनलमा बेहोरेको हारको बदला लिने अवसर नेपाललाई रहेकाले त्यो अवसरलाई प्रत्यक्ष नियाल्न घरेलु समर्थकहरु रंगशालामा ओइरिने निश्चित छ ।

दर्शकहरको सुविधाका लागि एन्फाले टिकट डिजिटल वालेट खल्ती एपमार्फत खरिद गर्न सकिने बताईसकेको छ । सहजताका लागि पनि दर्शकहरुले घरै बसी खल्ती एपबाट सोझै टिकट खरिद गर्न सक्नेछन् । फाइनल खेलको टिकट मुल्य सामान्यतर्फ ५०० र विशिष्ठतर्फ १००० तोकिएको छ ।