काठमाडौं । महत्वपूर्ण खेलमा जित हात पार्दै वालिङ नगरपालिका र कोशी प्रदेश जारी एन्फा महिला लिग राष्ट्रिय फुटबल प्रतियोगिताको सुपर लिग चरणमा प्रवेश गरेका छन् ।

बिहीबार एन्फा कम्प्लेक्समा भएको नवौं चरणको पहिलो खेलमा वालिङले चन्द्रपुर नगरपालिकामाथि २–१ को रोमाञ्चक जित निकाल्यो । वालिङका लागि ुसुक्रिया मिया र ज्याकलिन नसालीले गोल गरे । पराजित चन्द्रपुरका लागि भने सुनिता सुनारले एक मात्र गोल फर्काईन् ।

यो जितपछि ९ खेलबाट १५ अंक जोडेको वालिङ शिर्ष चारमा परेको छ । उता पराजित चन्द्रपुर भने ८ अंकका साथ लिगतालिकाको आठौं स्थानमा रहेर सिजनको समापन गर्न बाध्य बनेको छ ।

त्यस्तै बिहीबार नै भएको अर्को खेलमा कोशीले सुदुरपश्चिम प्रदेशमाथि ४–० को एकतर्फी जित निकाल्यो । कोशीका लागि समिक्षा मगरले दुई गोल गर्दा ममता राउत र खुश्मा राईले समान एक–एक गोल गरे ।

यो जितपछि ९ खेलबाट १४ अंक जोड्दै कोशी लिगतालिकाको पाँचौं स्थानमा रहेर वालिङसँगै दोस्रो चरणमा प्रवेश गरेको छ । पराजित सुदुरपश्चिम भने अंकविहीन रुपमा पुछार मै रहेर लिगको समापन गरेको छ ।

सुपर लिग चरणमा कोशी र वालिङ बाहेक तीन विभागीय टोलीहरु एपिएफ, पुलिस र आर्मीले पनि स्थान बनाएका छन् । सुपर लिग चरणका खेलहरु भने डबल राउण्ड रोबिनका आधारम हुनेछ ।