काठमाडौं । एन्फा युथ लिग अन्तर्गत शुक्रबार भएको दोस्रो चरणको अन्तिम दुई खेलहरुमा मनाङ मस्र्याङ्दी क्लबले लगातार दोस्रो जित हात पार्दा मच्छिन्द्र फुटबल क्लब भने बराबरीमा रोकिएको छ ।

सातदोबाटो स्थित एन्फा कम्प्लेक्समा भएको खेलमा मनाङले त्रिभुवन आर्मी फुटबल क्लबलाई १–० को झिनो अन्तरले हरायो । मनाङका लागि समन हटुवालले एक मात्र निर्णायक गोल गर्दै टोलीलाई महत्वपूर्ण तीन अंक दिलाए ।

त्यस्तै शुक्रबार नै भएको अर्को खेलमा मच्छिन्द्रले जावलाखेल युथ क्लबसँग २–२ गोलको बराबरी खेल्दै अंक बाँड्न बाध्य बन्यो । मच्छिन्द्रका लागि अनिल थिङ र कबिर तामाङले गोल गरे । उता जावलाखेलका लागि भने विवश दर्लामी र अनिष चौधरीले गोल गरेका थिए ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।