काठमाडौं । अखिल नेपाल फुटबल संघ (एन्फा) र स्टार हस्पिटल बीच आइतबारदेखि शुरु भएको एन्फा युथ लिगका लागि मेडिकल सहकार्यलाई लिएर सम्झौता भएको छ । यो सम्झौतासँगै स्टार हस्पिटल युथ लिगको आधिकारिक मेडिकल पार्टनर समेत बनेको छ ।

सम्झौता अनुसार स्टार हस्पिटलले युथ लिग अवधिभर मैदानमा दक्ष चिकित्सकसँगै अत्याधुनिक एम्बुलेन्स सेवा उपलब्ध गराउनेछ । साथै प्राथमिक उपचारसँगै आवश्यक भवितव्य उपचार मैदान मै दक्ष जनशक्तिबाट उपलब्ध गराउने सम्झौता भएको छ ।

आइतबार एन्फा कम्प्लेक्समा भएको उक्त सम्झौता कार्यक्रममा एन्फाका तर्फबाट अध्यक्ष पंकज विक्रम नेम्वाङ तथा स्टार हस्पिटलको तर्फका अध्यक्ष किशोर कुमार महर्जनले सम्झौतापत्रमा हस्ताक्षर र आदानप्रदान गरे ।