काठमाडौं । बुधबार सम्पन्न एन्फा यु–१६ युथ लिग फुटबल प्रतियोगिताको उपाधि मच्छिन्द्र फुटबल क्लबले जितेको छ । एन्फा कम्प्लेक्समा भएको लिग चरणको अन्तिम खेलमा मच्छिन्द्रले त्रिभुवन आर्मी फुटबल क्लबलाई २–१ ले हराउँदै च्याम्पियन बनेको हो ।

विजेता बनेको मच्छिन्द्रले उपाधिसहित नगद १ लाख हात पार्यो भने दोस्रो स्थान हासिल गरेको नेपाल एपिएफले ५० हजार सहित ट्रफीमा चित्त बुझायो ।

व्यक्तिगत विधातर्फ नेपाल पुलिस क्लबका सुबास बम प्रतियोगिता कै सर्वोत्कृष्ट खेलाडी चुनिए । मच्छिन्द्रका पेम्बा नर्बु भुटिया उत्कृष्ट गोलरक्षक बने । संकटाका सबिन लुंगेली मगरले सर्वाधिक गोलकर्ताको पुरस्कार जिते ।

अखिल नेपाल फुटबल संघ (एन्फा) को आयोजनामा भएको प्रतियोगितामा ए डिभिजनका कुल १० टोलीहरुले सहभागिता जनाएका थिए ।