काठमाडौं । साफ यु–१६ च्याम्पियनसिपमा सहभागिताका लागि नेपालको राष्ट्रिय यु–१६ टोली तयार पार्न देशव्यापी रुपमा छनौट भई आएका खेलाडीहरु मध्येबाट अन्तिम चरणपछिको बन्द प्रशिक्षणमा ४० खेलाडीहरु छनौट भएका छन् ।

साथै अखिल नेपाल फुटबल संघ (एन्फा) ले यही साउन २८ गते शनिबार बेलुका ५ बजेदेखि बन्द प्रशिक्षण शुरु गर्ने पनि जानकारी गराएको छ । र, बन्द प्रशिक्षणमा परेका खेलाडीहरुले आवश्यक कागजातसहित तोकिएको मिति र समयमा सम्पर्क गर्न समेत बताइएको छ ।

स्मरण रहोस, यस वर्षको साफ यु–१६ च्याम्पियनसिप आउँदो भदौ १५ देखि २५ गते भुटानमा आयोजना हुँदैछ । प्रतियोगिताको समूह ए मा रहेको नेपालले साविक विजेता भारत र बंगलादेशसँग प्रतिस्पर्धा गर्नेछ । समूह बी मा भुटान, माल्दिभ्स र पाकिस्तान रहेका छन् । समूहको शिर्ष दुई टोली सेमिफाइनलमा प्रवेश गर्नेछ ।