काठमाडौं । नेपाल र मौरिससबीच हुने दुई अन्तर्राष्ट्रिय मैत्रीपुर्ण फुटबल म्याचमा एक तिहाई दर्शकहरुले रंगशालामा प्रवेश पाउने भएका छन् । यो कुराको आधिकारिक पुष्टी मंगलबार अखिल नेपाल फुटबल संघ (एन्फा) ले गरेको छ । यद्यपि रंगशाला प्रवेश गर्न नेपाल सरकारले तोकेको निश्चित स्वास्थ्य सुरक्षाका मापदण्ड दर्शकहरुले पूरा गरेको हुनुपर्नेछ ।

त्यस्तै एन्फाले दुई खेलका लागि टिकट मूल्य पनि तोकेको छ । जसअनुसार सामान्यतर्फ ५ सय र भिआईपीतर्फ १ हजार टिकट मुल्य तोकेको एन्फाले जनाएको छ । साथै दशरथ रंगशालामा हुने दुवै खेल कृत्रिम प्रकाशमा हुने पनि एन्फाले पुष्टी गरेको छ । एन्फाका अनुसार दुवै खेल बेलुका ४ः४५ बजेदेखि शुरु हुने जानकारी दियो ।

स्मरण रहोस, नेपाल र मौरिससबीचको खेल यहि माघ १५ र १८ गतेका दिन हुँदैछ । त्यसका लागि मौरिससको राष्ट्रिय फुटबल टोली सोमबार नै नेपाल आइसकेको छ र अभ्यास पनि शुरु गरिसकेको छ । उता नेपाली फुटबल टोली पनि हाल बन्द प्रशिक्षणमा व्यस्त छ ।