निजगढ | भदौ २१बाराको स्थानीय खेलकुद क्षेत्रका लागि एक ऐतिहासिक र गौरवपूर्ण सफलता हात लागेको छ। निजगढ फुटबल क्लब का उदयीमान युवा खेलाडी सुजित लोप्चन यू-१५ (Under-15) राष्ट्रिय फुटबल टोलीको अन्तिम छनोटमा पर्न सफल भएका छन्।

 

ललितपुरको सातदोबाटोस्थित अखिल नेपाल फुटबल संघ (एन्फा) मुख्यालयमा भएको देशव्यापी बन्द प्रशिक्षण र विशेष छनोट प्रतियोगिताबाट सुजितले उत्कृष्ट खेल प्रदर्शन गर्दै अन्तिम २० खेलाडीको सूचीमा आफ्नो स्थान सुरक्षित गरेका हुन्।

 

एन्फाले सार्वजनिक गरेको आधिकारिक प्रतिवेदन अनुसार सुजित लोप्चनलाई टोलीको रक्षापंक्ति सम्हाल्ने मुख्य जिम्मेवारी अर्थात् सेन्टर ब्याक (Center Back - CB) भूमिकाका लागि छनोट गरिएको हो। निजगढ फुटबल क्लबबाट खेल्दै आफ्नो उत्कृष्ट डिफेन्सिभ कौशल, बलियो शारीरिक क्षमता र खेल रणनीति प्रदर्शन गरेकै कारण उनले देशभरिका सयौँ प्रतिभावान खेलाडीहरूलाई पछि पार्दै छनोट सूचीको दोस्रो नम्बरमा नाम निकाल्न सफल भएका हुन्।

 

यो सफलतासँगै सुजितले अन्तर्राष्ट्रिय फुटबल मञ्चमा नेपाल र आफ्नो गृह नगर निजगढको नाम उच्च राख्ने सुनौलो अवसर प्राप्त गरेका छन्। उनको यस ऐतिहासिक उपलब्धिले निजगढ फुटबल क्लब, स्थानीय खेलप्रेमी र सम्पूर्ण बारा जिल्लाबासीमा ठुलो उत्साह र खुसीयाली छाएको छ।