चिल्हिया । रुपन्देहीको सियारी गाउँपालिकामा जारी स्व. मोहन घर्ती क्षेत्री स्मृति चौथो डिवाइसी कप खुला सेभेन ए साईड फुटबल प्रतियोगिताको फाइनलमा जागृति युवा क्लब र आयोजक डिवाइसी क्लब भिड्ने भएका छन् ।

शनिबार सम्पन्न पहिलो सेमिफाइनलमा जागृतिले योङ ब्वाईज क्लबलाई ४–० ले हराउँदै फाइनल सथान तय गर्यो । जागृतिको जितमा कप्तान रोशन थापाले दुई गोल गर्दा थप दुई गोल सुरज चौधरी र निर थापा मगरले गरे ।

त्यस्तै शनिबार नै भएको दोस्रो सेमिफाइनलमा आयोजक डिवाइसीले हाटी अमुवा युवा क्लबलाई समान ४–० को अन्तरले हराउँदै उपाधि नजिक पुग्न सफल भयो । डिवाइसीका लागि मुकुल क्षेत्रीले दुई गोल गर्दा थप दुई गोल सुगम अधिकारी र उमेश थापाको नाममा रह्यो ।

प्रतियोगिता अन्तर्गत फाइनल खेल यही साउन २५ गते आइतबार आयोजक डिवाइसी र जागृति युवा क्लब बीच हुने प्रचार प्रसार संयोजक सागर राना मगरले जानकारी दिए ।

डिवाइसी क्लब, सियारी गाउँपालिका–१, चिल्हियाको आयोजनामा जारी प्रतियोगिताको विजेताले उपाधिसहित नगद ५० हजार हात पार्नेछ भने उपविजेताले २५ हजारसहित ट्रफी, मेडल र प्रमाणपत्र प्राप्त गर्नेछ । त्यस्तै विधागततर्फ पनि उचित पुरस्कारको व्यवस्था गरिएको आयोजक क्लबका अध्यक्ष दिनेश कार्कीले जानकारी दिए ।