नेपालगञ्ज । विभागीय प्रतिद्धन्द्धी नेपाल पुलिस क्लबलाई १–० ले पराजित गर्दै सशस्त्र प्रहरी बलको एपिएफ क्लब प्रथम लुम्बिनी कप अन्तर्राष्ट्रिय आमन्त्रण महिला फुटबल प्रतियोगिताको च्याम्पियन बनेको छ । इन्जुरी समयमा गीता रानाको हेड गोल नै एपिएफलाई उपाधि जिताउन निर्णायक गोल बन्यो ।

आठ टोली सहभागी प्रतियोगिताको विजेता एपिएफले ५ लाख ५ हजार ५५५ रुपैयाँ र उपविजेता नेपाल पुलिसले २ लाख ५० हजार रुपैयाँ, ट्रफी, मेडल प्राप्त गरेका छन् । एपिएफ लगातार तेस्रो मोफसल प्रतियोगिताको उपाधि जित्न सफल भयो । यसअघि इलाम र चितवन गोल्डकपको उपाधि जितेको थियो । राष्ट्रिय टोलीका एक दर्जन खेलाडी समावेश गरेको एपिएफले त्यसअघि महिला लिगको उपाधि उचालेको थियो ।

एपिएफले पहिलो खेलमा कर्णाली प्रदेशलाई ६–० तथा सेमिफाइनलमा रौतहट जिल्ला फुटबल संघलाई ३–० ले हराएको थियो । यता, पुलिसले पहिलो खेलमा भारतको सिलिगुडी एफसीलाई ४–० तथा सेमिफाइनलमा भने विभागीय अर्को टोली त्रिभुवन आर्मी क्लबलाई सेडनडेथमा ६–५ ले पराजित गरेको थियो ।

आजको खेल निकै प्रतिस्पर्धात्मक बनेको थियो । आजको खेलमा सोचे अनुसारको प्रस्तुती दिन नसकेको बिजेता टिम एपीएफका कोच भगवती थापाले बताएकी छिन । प्रतिद्धन्दी नेपाल पुलीस क्लबले कडा चुनौती दिएको उनले स्विकार समेत गरीन । उता घरेलु मैदानमा जित हासिल गर्दे नेपाल पुलिस क्लबका क्याप्टेन निरु थापाको सपना भने अधुरो भएको छ । यद्यपी उनले घरेलु मैदानमा उपबिजेता बनेकोमा खुशी नै ब्यक्त गरेकी छिन ।

फाइनल खेलको प्लेयर अफ द फाइनल एपीएफका गिता राना घोषित भइन । उनलाई राष्ट्रिय खेलकुद परिषदका सदस्य दिनेश बिष्टले नगद रु ५ हजार प्रदान गरे । रेफ्री कृति सेन ,जमुना आले ,अमर घले र कृष्ण खत्री लाई बाँकेको कोहलपुर नगरपालिकाका कार्यबाहक नगर प्रमुख संगिता सुवेदी र खजुरा गाउँपालिकाका उपाध्यक्ष मन्जु मल्लले मायाको चिनो प्रदान गरेका थिए ।

यसैगरी प्रतियोगिताको उत्कृष्ट गोलरक्षक नेपाल पुलिस क्लबका उषा नाथलाई नेपाली कांग्रेस बाँकेका सभापती नारायण प्रसाद गौडेल र नेकपा एमाले बाँके अध्यक्ष निरक गुरुङले नगद रुं १० हजारले सम्मान गरेका थिए ।

यसैगरी उत्कृष्ट डिफेन्डर एपिएफका गिता राना, स्ट्राइकर अनिता केसी र प्रशिक्षक भगवती थापालाई पुरस्कृत गरीएको थियो । यसैगरी सर्वोत्कृष्ट खेलाडी एपीएफका क्याप्टेन अनिता बस्नेतले नगद रु २५ हजार हात पारेकी छिन ।

प्रतियोगिताको बिजेता तथा उपबिजेता तथा उत्कृष्ट खेलाडीहरुलाई शसस्त्र प्रहरीका एसएसपी गंगाराम सुवेदी ,प्रायोजक ईसेवा नेपालगन्ज शाखाका म्यानेजर महेन्द्र राना, नेपालगन्ज उद्योग बाणिज्य संघका पुर्व अध्यक्ष कृष्ण प्रसाद श्रेष्ठ, साविक मध्यपश्चिम क्षेत्रिय खेलकुद विकास समिति नेपालगन्जका कार्यालय प्रमुख महेश चन्द, नेपालको पहिलो महिला ओलम्पियन खेलाडी पार्वती थापा ,हस्पिटालिटी पार्टनर होटल सिटी प्यालेस नेपालगन्जका प्रमुख लोकेन्द्र अर्याल ,नेपालगन्ज उपमहानगरपालिकाका प्रमुख प्रशान्त बिष्ट , बाँकेका प्रमुख जिल्ला अधिकारी धर्मराज जोशी ,लुम्बिनी प्रदेशका सामाजिक विकास मन्त्री जन्मजय तिमिल्सिना ,अन्तरालका कार्यकारी निर्देशक जयनारायण शाह ,नेपाल पत्रकार महासंघ बाँकेका अध्यक्ष नविन गिरी ,पुर्व अध्यक्ष निरज गौतम र बाँके जिल्ला फुटबल संघका अध्यक्ष भोजराज शाही लगायतले पुस्कार ,मेडल तथा ट्रफी वितरण गरेका हुन ।

अन्तरालको आयोजना तथा बाँके जिल्ला फुटबल संघको सहकार्यमा भएको प्रतियोगितामा घरेलु टिम बाँके–११, सशस्त्र प्रहरी बलको एपिएफ, नेपाल पुलिस क्लब, त्रिभुवन आर्मी क्लब, कर्णाली प्रदेश फुटबल संघ, सुदूरपश्चिम प्रदेश फुटबल संघ, रौतहट जिल्ला फुटबल संघ र भारतको सिलगुडी फुटबल क्लब सहभागी थिए ।

प्रतियोगिता सुरु हुनु अगाडि अन्तरालका कार्यकारी जयनारायण शाहले स्वागत गर्दै लुम्बिनी कपको पहिलो संस्करणलाई सहयोग गर्ने स्थानिय तह ,प्रदेश सरकार ,स्थानिय व्यापारी तथा सम्पूर्ण प्रयोजकहरुलाई धन्यवाद दिए । उनले लुम्बिनी कपलाई सफल बनाउन ठूलो टिमको मेहनत रहेकाले यो खेल खेलाडीका लागि अगाडी बढ्न कोशेढुंगा सावित हुने बताए ।

आजको फाईनल खेललाई सम्बोधन गर्दै प्रमुख अतिथि तथा लुम्बिनी प्रदेशका सामाजिक विकास मन्त्री जन्मजय तिमिल्सेनाले खेल क्षेत्रले समाजको आमूल परिवर्तन गर्ने बताएका छन् । खेलले सभ्य समाजको निर्माण गर्ने बताउँदै उनले भने“खेलले भूगोलको पहिचान बनाउने गर्छ । भोको पेटले खेल खेल्न नसकिने भएकाले लुम्बिनी प्रदेश खेल क्षेत्रका लागि बजेटको तयारीमा रहेका छौं । ”उनले लुम्बिनी कपले एक आपसमा आत्मियता र सहयोगी भावना बढाउने बताए। प्रतियोगिता सुरु हुनु अगाडी बाके जिल्लाबाट प्रतिनिधित्व गर्दै विभागिय टिम नेपाल पुलिसमा क्याप्टेनको भूमिका निभाईरहेकी निरु थापालाई सम्मान गरिएको थियो ।

बाँकेको जानकी गाउँपालिका वडा नम्बर १ शिवपुरी घर भएर देश तथा विदेशमा पहिचान बनाइसकेकी खेलाडी निरुलाई बाँके जिल्ला फुटबल संघले प्रमाणपत्र र नगद रु.२५ हजार सहित सम्मान गरेको हो । निरूलाई लुम्बिनी प्रदेशका सामाजिक विकास मन्त्री जन्मजय तिमिल्सिना,बाँके जिल्ला फुटबल संघका अध्यक्ष भोजराज शाही र अन्तरालका कार्यकारी जयनारायण शाह लगायतले सम्मान गरेका थिए ।

यसअघि फिफा एन्थम र राष्ट्रिय गीत प्रस्तुत गरिनुका साथै साना खेलाडी बालबालिकाहरूले हात समातेर खेलाडीलाई मैदान सम्म लगेका थिए । यो दृश्य निकै रोचक देखिएको थियो । साथै आज वैशाख १२ गते राष्ट्रिय भूकम्प दिवस पनि परेकाले विक्रम संवत् २०७२ साल वैशाख १२ गतेको महाभूकम्पमा परी ज्यान गुमाएका व्यक्तिहरूको सम्झनामा मौन धारण गरिएको थियो । आजको फाइनल खेल लुम्बिनी प्रदेशका सामाजिक विकास मन्त्री जन्मजय तिमिल्सिनाले मुख्य रेफ्री कृति सेनलाई बल हस्तान्तरण गरेपछि सुरु भएको थियो ।