झापा । डासाब युवा क्लब अर्जुनधारा झापाले आयोजना गरेको दोस्रो प्रदेशस्तरीय फुटबल प्रतियोगिताको उपाधि झापा एफसीले जितेको छ ।
स्पर्धी इलाम तिनघरेको न्यू भिजन युथ क्लबलाई २-१ गोलअन्तरले पराजित गर्दै झापा एफसीले उपाधि हात पार्यो । पहिलो हाफ दुवै टोलीले गोलरहित बराबरी खेलेका थिए ।
तर, दोस्रो हाफमा झापाले गोल गर्दै अग्रता लिएको हो । झापाका लागि दिपेश श्रेष्ठले गोल गरेका हुन् भने इलामले केही मिनेटमै गोल गरेर खेलमा फर्किएको थियो । झापाका गोलरक्षक आयुश योङहाङको सानो गल्तीको फाइदा उठाउँदै इलामका रमेश क्षेत्रीले बराबरी गोल गरे ।
यसैबीच, खेल सकिन करिब ५ मिनेट बाँकी रहँदा झापाका श्याम मुर्मूको प्रहार पोस्टमा लाग्दै भित्रिँदा सञ्जय धिमालले गोल गरेर टोलीको जित सुनिश्चित गरेका हुन् ।
खेलको बेस्ट प्लेयर भने इलामका रमेश क्षेत्री घोषित भए । अन्य विधागत पुरस्कारतर्फ झापाको बर्चश्व रह्यो । प्रतियोगिताको उत्कृष्ट गोलरक्षक आयुश योङहाङ, श्याम मुर्मू बेस्ट मिडफिल्डर, रोशन धिमाल बेस्ट डिफेन्स, दिपेश श्रेष्ठ प्लेयर अफ दी म्याच बने ।
यसैगरी, आयोजकका हरि मगर सर्वाधिक गोलकर्ता बन्दा आयोजककै मिराज मल्ल उदीयमान खेलाडी घोषित भए । उनीहरुले जनही एक हजार पाँच सय रुपैयाँ पाए । विजेता झापा एफसीले नगद ५० हजार, उपविजेताले नगद ३० हजार र आकर्षक ट्रफी पायो ।
खेल संयोजक बेनुकुमार राईको अध्यक्षतामा भएको फाइनल खेलको विजेता तथा उपविजेताहरुलाई प्रदेश १ का पूर्वमुख्यमन्त्री उद्दव थापा, अर्जुनधारा १ का वडाध्यक्ष उपेन्द्र बस्नेत, ३ का अध्यक्ष सिताराम भट्टराईलगायतले पुरस्कार प्रदान गरेका थिए ।
