काठमाडौं । इण्डोनेसियाको शिर्ष फुटबल लिग खेलिरहेका नेपालका चर्चित डिफेन्डर रोहित चन्दको टोलीले महत्वपूर्ण जित हात पारेको खेलमा रोहितले भने रातो कार्ड खाएका छन् ।

पेर्सिस विरुद्धको खेलमा रोहितको टोली पेर्सिक केदिरीले १–० को जित निकाले तापनि दोस्रो हाफमा रोहितले रातो कार्ड खान पुगेका थिए । टोलीको पहिलो रोजाई मै उत्रिएका रोहितले ६९औं मिनटमा रातो कार्ड खान पुगेका थिए ।

दश खेलाडीमा सिमित हुनुका बावजुद पेर्सिक केदिरीले खेलको अन्तिमतिर गोल गर्न सफल भएको थियो । ८२औं मिनटमा रामिरो फेरगोन्जीले केदिरीका लागि एक मात्र निर्णायक गोल गर्दै टोलीलाई महत्वपूर्ण जित दिलाएका थिए ।

यो नतिजापछि ६ खेलबाट ११ अंक जोडेको पेर्सिक केदिरी लिगतालिकाको छैठौं स्थानमा छ । पराजित पेर्सिस भने ३ अंकका साथ १५औं स्थानमा छ । शिर्ष स्थानमा भने १६ अंकका साथ अपराजित पर्सेबया रहेकोछ ।

रोहितको टोलीले आफ्नो आगामी खेल आउँदो शनिबार पिएसबिएस बियाक नमफोरसँग खेल्नेछ ।