काठमाडौं । एन्फा महिला लिग राष्ट्रिय फुटबल प्रतियोगिता अन्तर्गत सोमबार वालिङ नगरपालिकाले उत्कृष्ट जित हात पार्दै महत्वपूर्ण तीन अंक जोडेको छ ।

सोमबार भएको एक मात्र खेलमा वालिङले पुछारमा संघर्षरत सुदुरपश्चिम माथि ५–१ को जित निकाल्यो । वालिङका लागि भिओला नामुडुले ह्याट्रिक पूरा गर्दा ज्याकलिन नसाली र सुष्मा तामाङले एक–एक गोल गरे । उता पराजित सुदुरपश्चिमका लागि भने रितिका कार्कीले एक मात्र गोल फर्काएकी थिईन् ।

यो जितपछि ५ खेलबाट ९ अंक जोडेको वालिङ लिगतालिकाको पाँचौं स्थानमा छ । उता एउटै जित र अंक जोड्न नसकेको सुदुरपश्चिम भने लिगतालिकाको पुछारमै संघर्षरत छ ।

कुल १० टोलीहरु सहभागि लिग विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । त्यस्तै विधागततर्फ पनि आकर्षक नगद पुरस्कारको व्यवस्था गरिएको छ ।

(तस्विरः एन्फा)