शनिश्चरे । बिर्तामोड युनाइटेड एफसी र बाहुनडाँगी एफसी झापा जिल्लास्तरीय ए डिभिजन क्लबमा उक्लिएका छन् ।

अर्जुनधारा ९ स्थित नमुना खेलमैदानमा सोमबार भएको दुई सेमिफाइनल खेलमा जित निकाल्दै ए डिभिजन क्लबको सूचीमा उक्लिएका हुन् । दुवैले जित दर्ता गर्दै फाइनलमा पनि प्रवेश गरेका छन्

पहिलो सेमिफाइनल खेलमा बाहुनडाँगीले सिरिजंगा स्पोर्टिङ क्लबलाई सडनडेथमा पराजित गरेको हो । खेलको निर्धारित समयमा दुवै टोलीले गोलरहित बराबरी खेलेपछि टाइब्रेकर रोजिएको थियो ।

तर, सडनडेथमा बाहुनडाँगीले ८-७ गोलअन्तरमा सिरिजंगालाई पछि पार्दै ए डिभिजनमा उक्लिएको हो । योसँगै बाहुनडाँगीले फाइनल यात्रा पनि तय गरेको छ ।

दोस्रो सेमिफाइनल खेलमा बिर्तामोडले सतासीधाम स्पोर्टिङ क्लबलाई गोलअन्तरले पराजित गर्दै ए डिभिजनमा स्थान बनाएको हो । बिर्तामोडले ए डिभिजन क्लबको मान्यता दिलाउनका लागि सतासीधामलाई ३-२ गोलले पराजित गरेको हो ।

फाइनल पुगेका दुवै टिमको खेल तथा ए डिभिजन र बी डिभिजन लिग फुटबल प्रतियोगिताको बुधबार समापन हुने झापा जिल्ला फुटबल संघका अध्यक्ष भगिरथ आले मामाले जानकारी दिए ।