काठमाडौं । शुरुवाती दुई खेलमा लगातार हार बेहोर्दै खराब शुरुवात गरेको बुटवल लुम्बिनी फुटबल क्लबले दोस्रो नेपाल सुपर लिग (एनएसएल) मा आइतबार पहिलो जित हात पारेको छ ।

दशरथ रंगशालामा भएको एक मात्र खेलमा बुटवलले अर्को नवप्रवेशी टोली स्र्पोटिङ इलाम फुटबल क्लबमाथि २–१ को जित निकाल्दै तीन खेलमा पहिलो जित दर्ता गर्न सफल भएको हो ।

खेलमा भएका तीन गोलहरु दोस्रो हाफमा सम्पन्न भए । ४९औं मिनटमा स्टेफन बिनोङको गोलबाट अग्रता लिएको बुटवलले त्यसलाई गुमाउन पुग्यो । ७९औं मिनटमा अब्दुलाए बा ले इलामका लागि बराबरी गोल फर्काए ।

यद्यपि खेलको ८८औं मिनटमा बुटवलका कप्तान एरिक बिष्टले दोस्रो तथा निर्णायक गोल गर्दै टोलीको पहिलो र महत्वपूर्ण जित सुनिश्चित गरे ।

खेलमा बुटवल लुम्बिनीका गोलरक्षक मोहमदु म्यान अफ द म्याच घोषित भए । उनले पुरस्कार वापत नगद ३० हजार हात पारे ।