काठमाडौं । फिफा विश्वकप र एएफसी एसियन कप छनौटको दोस्रो चरणमा प्रवेश गर्न सफल नेपाली राष्ट्रिय फुटबल टोलीका सदस्यहरुलाई अखिल नेपाल फुटबल संघ (एन्फा) ले नगदसहित पुरस्कृत गर्ने भएको छ ।

पहिलो चरणको छनौट प्रतियोगिताको महत्वपूर्ण खेलमा जित हात पारी स्वदेश फर्किएको राष्ट्रिय टोलीलाई एन्फा अध्यक्ष पंकज विक्रम नेम्वाङले जनही ५१ हजारका दरले पुरस्कृत गर्ने घोषणा गरेका हुन् ।

स्मरण रहोस, छनौट प्रतियोगिताको पहिलो चरणतर्फ लाओस विरुद्ध भएको दुई लेगको खेलमा नेपालले २–१ को अग्रता कायम गर्दै दोस्रो चरणमा प्रवेश गर्न सफल भएको थियो ।

नेपालले दशरथ रंगशालामा भएको पहिलो लेगको खेलमा १–१ को बराबरी खेलेको थियो भने लाओसमा भएको दोस्रो लेगको खेलमा १–० को जित निकालेको थियो ।

नेपालले अब दोस्रो चरणको छनौट प्रतियोगितातर्फ समूह एच मा रहेर बलियो युएई, बहराईन र यमनसँग होम एण्ड अवेका आधारमा प्रतिस्पर्धा गर्नेछ । दोस्रो चरणको छनौट खेलहरु आउँदो नोभेम्बर महिनादेखि शुरु हुने कार्यक्रम छ ।