कञ्चन । फराकिलो जित निकाल्दै कपिलवस्तु–११ यहाँ जारी कञ्चन गोल्डकप नकआउट फुटबल प्रतियोगिताको फाइनलमा प्रवेश गरेको छ । बिहीबार भएको दोस्रो सेमिफाइनलमा सैनामैना खेलकुद विकास समिति, रुपन्देहीलाई ६–१ को फराकिलो अन्तरले हराउँदै कपिलवस्तु उपाधि नजिक पुगेको हो ।

कञ्चन गाउँपालिका ४, दियो बजार स्थित स्थानीय खेलमैदानमा भएको खेलमा कपिलवस्तुका लागि सन्जु सेनले ह्याट्रिक गरे । त्यस्तै अरुण थारुले दुई गोल गरे भने सन्दिप चौधरीले एक गोल गरेका थिए । उता पराजित सैनामैनाका लागि समिर श्रेष्ठले एक मात्र सान्त्वना गोल फर्काएका थिए ।

खेलमा कपिलवस्तुका ह्याट्रिककर्ता सन्जु सेन म्यान अफ द म्याच समेत घोषित भए । उनले पुरस्कार वापत नगद ११ सय र ट्रफी हात पारे । कपिलवस्तुले अब फाइनलमा फागुन २१ गते शनिबार डिएमसी, तुल्सीपुरसँग खेल्ने प्रचार प्रसार संयोजक टिका थापा मगरले जानकारी दिए ।

हिमालयन सामुदायिक विकास केन्द्र, कञ्चन ४, दियोबजारको आयोजना तथा नेपाल लोकतान्त्रिक खेलकुद संघ, रुपन्देहीको सह–आयोजनामा जारी प्रतियोगिताको विजेताले उपाधिसहित नगद १ लाख ५१ हजार हात पार्नेछ भने उपविजेताले १ लाख प्राप्त गर्नेछ ।