काठमाडौं । जारी एएफसी महिला एसियन कपमा उपाधिको दावेदार मध्ये एक र गत संस्करणको उपविजेता अष्ट्रेलियाले आफ्नो पहिलो खेलमै फराकिलो जित हात पारेको छ ।

मुम्बई एरिनामा भएको समूह बी तर्फको पहिलो खेलमा अष्ट्रेलियाले इण्डोनेसिया माथि १८–० को भारी अन्तरको जित दर्ता गरेको हो । अष्ट्रेलियन टोलीका लागि स्टार फरवार्ड साम केर एक्लैले ५ गोल गरिन् । त्यस्तै इमिली इग्मोन्डले ४ गोल गरिन् भने हेली रासो, इली कारपेन्टर र क्याह सिमोनले समान २–२ गोलको योगदान दिए ।

त्यसैगरी क्याटलिन फुर्ड, मेरी फोवलर र एवी लुकले विजयी टोलीका लागि थप १–१ गोल गरे । अष्ट्रेलियाले आफ्नो आगामी खेल २४ जनवरीका दिन फिलिपिन्ससँग खेल्नेछ भने सोही दिन इण्डोनेसियाले थाइल्याण्डको सामना गर्नेछ ।