काठमाडौं । दक्षिण कोरियामा रहेका नेपालीहरुबीच भएको प्रथम नेपाली क्लब फुटसल प्रतियोगिताको उपाधि हाइपर फन्ड एफसीले जितेको छ ।

दक्षिण कोरियाको छुङछन्बुक्दो उम्सङ मुगुक शहरमा भएको प्रतियोगिताको फाइनलमा हाइपर फन्डले मजोन एफसीलाई हराउँदै उपाधिमाथि कब्जा जमाएको हो । प्रतियोगिता कै सर्वोत्कृष्ट खेलाडी विजेता टोलीका गणेश राई घोषित भए । सर्वाधिक गोलकर्ताको पुरस्कार निशान कार्कीले हात पारे ।

विजेता बनेको हाइपर फन्डले उपाधि सहित १५ लाख कोरियन वन हात पार्यो । त्यस्तै उपविजेता मजोन एफसीले ५ लाख कोरियन वनमा चित्त बुझाउन बाध्य भयो ।

वैदेशिक रोजगारका क्रममा हाल कोरियामा रहेका नेपालीहरुबीच आत्मियता र भाइचारा कायम गर्ने उद्देश्यले हिमालयन फुटबल क्लबको आयोजनामा भएको प्रतियोगितामा कुल १० टोलीहरुले सहभागिता जनाएका थिए ।