काठमाडौं । मनास्लु वल्र्ड स्कुलले तेश्रो वडा अध्यक्ष कप अन्तरविद्यालय फुटबल प्रतियोगिताको उपाधि बुधबार जितेको छ ।

चावहिलमा भएको फाइनलमा मनास्लुले डिफेन्डिङ च्याम्पियन एनआईसी एकेडेमीलाई पराजित गर्याे । विजेता मनास्लुले ३० हजार र उपविजेता एनआईसीले १५ हजार नगद पुरस्कार हात पारे ।

काठमाडौं महानगरपालिका वडा ७ को आयोजना तथा चावहिल स्पोर्ट्स क्लबको प्राविधिक सहयोगमा भएको प्रतियोगितामा एनआईसीका सुनिश्चित सुवेदी सर्वोत्कृष्ट खेलाडी घोषित भए भने एनआईसीका आर्यब श्रेष्ठ उदीयमान खेलाडी चुनिए ।

एनआईसीका यसोन थापा मगर उत्कृष्ट गोलरक्षक तथा मनास्लुका देविन कार्की उत्कृष्ट खेलाडी बने । चारैले जनही २ हजार ५ सय नगद पुरस्कार हात पारे ।

विजेतालाई आयोजक वडा ७ का अध्यक्ष विमलकुमार होडालगायतले एक कार्यक्रमबीच पुरस्कृत गरे । जेठ १५ गतेदेखि सुरु भएको प्रतियोगितामा २० छात्र टिमले नकआउट आधारमा प्रतिस्पर्धा गरेका थिए ।