काठमाडौं । शहिद स्मारक बी डिभिजन लिगमा मध्यपुर युथ एसोसिएशन र च्यासल युथ क्लबले सिजनको अन्तिम खेलमा जित हात पार्दै सिजनको सुखद समापन गरेका छन् ।

बुधबार दिनको पहिलो खेलमा मध्यपुरले नयाँवस्ती युवा क्लबमाथि ४–० को सहज जित निकाल्यो । मध्यपुरका लागि विज्ञान खड्काले दुई गोल गर्दा राहुल खड्का र साहिल केसीले एक–गोल गरे ।

यो जितपछि १३ खेलबाट १८ अंक जोडेको मध्यपुर शिर्ष पाँचमा रहेर लिगको समापन गरेको छ । पराजित नयाँवस्ती भने ५ अंकका साथ पुछारमा रहेर सिजनको अन्त्य गर्न बाध्य बन्यो ।

त्यस्तै अर्को खेलमा च्यासलले झापा एफसीमाथि २–० को जित निकाल्दा च्यासलका लागि दुवै गोल आशिष थारुले गरे । यो जितपछि १३ खेलबाट १८ अंक जोड्दै च्यासलले लिगमा सुखद समापन गर्न सफल भयो भने झापा पनि समान १८ अंक मै सिमित बन्यो ।